21
Mon, Aug
92 New Articles

Thantlang Methodist Church Biakinn Thar Luhnak An Tuah

News

Salai Elvis| 2017 February 22| Thantlang sianginn sang um Methodist Church Biakinn thar luhnak cu February 22 suimilam 10:00 tluk ah an tuah.

Hi Biakinn thar luhnak ah Korea in minung 16, Kawlram chung khual lian- Mandalay in pahnih le Hakha Distinct in minung 6 tluk nih an telpi hna tiah theih a si.

 

“Hi biakinn luhnak ah Korea ramchung in Methodist Pastor lutlai bik nih hunnak a kan tuahpiak. Nu 11 le pa 6 Korea in hi Biakinn luhnak ah an ra kho. Khuallian kan sawmmi hna zong tam ngai an ra. Anmah Korea lei nih hi Biakinn saknak caah ks. sing 200 an kan bawmh. Anmah bawmhnak in kan sakmi a si. Kanmah thazaang in ks. sing 315 hrawng kan dih ve. Kan Biakinn chung ah a herhmi thil thutden le herh dangdang zei hmanh a um rih lo. Hi Biakinn cu 2016 January thla in thing inn in kan sak mi a si. Zeihmanh a tlamtling rih lo nain hunnak kan tuah. Atu hi Pastor lo in kan um lio a si” tiah Church Chiarman Pu Tei Kian nih TCP ah a chim.

“Kan biakinn luhnak hmun ah Thantlang bukip Pastor le hruaitu hna sawm dih an si. Thantlang Methodist bu hi 2001 kum in rak dirh a si. Cu kum ah cun Congthia khua in keimah hi Evangelist in hruaitu ah ka rak um. Thantlang peng ah Methodist Church hi Sihcang, Tlangte, Mualkai, Tihbual, Tlangpi, Lungler, Sialam, Zephai le Congthia ah an um” tiah Evan. Zung Mang nih TCP ah a chim.

Thantlang Methodist Church Khrihfabu cu a tu lio ah Khrihfacu chungtel minung 115 an si.  Hi Biakinn luhnak ah Sia le Vok pahnih an thah. A tangka in ks. Sing 30 hrawng an dih. Khual he lai he minung 600 hrawng nih sunglawi takin biakinn luhnak an tuah tiah theih a si.

BLOG COMMENTS POWERED BY DISQUS